Depatman d Eta pase lòd pou "kanpe travay" Vandredi pou tout asistans etranje Ameriken epi rete debousman nouvo asistans dapre yon mesaj ofisyèl Reuters wè. Nouvèl la vini apre Prezidan Donald Trump te pase lòd pou yo pran yon poz pou revize si debousman asistans la ann akò ak politik etranje Etazini.
Mesaj ofisyèl la ke biwo Depatman d Eta ki travay sou asistans etranje ekri epi ke Sekretè d Eta Marco Rubio siyen, deklare gen eksepsyon ki fèt pou finansman Etazini ap bay Izrayèl ak Ejipt.
Okenn lòt peyi pa mansyone nan mesaj la.
Mezi sila a riske koupe plizyè milya dola asistans ki vize sove lavi moun. Lèzetazini se pi gwo donatè asistans toupatou nan mond lan. Nan ane 2023 Ameriken te bay $72 milya asistans.
Kèk hè d tan apre li te pran pouvwa a Lendi 20 Janvye, Trump te pase lòd pou kanpe pandan 90 jou, asistans etranje pou devlopman pandan yo rezive efikasite asistans sa a ak gade si li ann konfòme ak politik etranje li. Li poko klè konbyen peyi lòd sa a afekte.
Jeremy Konynyk, yon responsab USAID deklare "se yon bagay fou". Misye se prezidan Refije Entènasyonal. Li ajoute: "Sa pral touye moun. Mwen vle di si yo aplike sa k ekri nan mesaj sa a, anpil moun pral mouri."