Meksik derefize akòde demann administrasyon Prezidan Donald Trump fè pou kite yon avyon militè Ameriken ki gen ladann migran Etazini depòte ateri lakay li. Se sa yon responsab Ameriken ak Meksiken di ajans nouvèl Reuters Vandredi (24 Janvye).
Avyon militè Ameriken depote 2 gwoup 80 migran nan Guatemala Vandredi. Gouvènman an patka pouse pou pi devan ak plan pou yon avyon transpò C-17 ateri Meksik sepandan, apre peyi sa a refize bay pèmisyon l.
Se NBC News ki te rapòte desizyon an an premye, epi yon responsab Ameriken ak yon responsab Meksiken te konfime nouvèl la.
Ministè afè etranje Meksiken an pibliye yon deklarasyon Vandredi pou di peyi a gen "trè bon relasyon" ak Etazini e li kowopere sou kestyon tankou imigrasyon.
Responsab Meksiken an pa bay rezon ki fè yo pat kite avyon an ateri. Pandansetan, ministè afè etranje a pa mansyone ensidan an.
Relasyon ant Etazini ak Meksik soule pale anpil depi Trump tanmen dezyèm manda li Lendi 20 Janvye ak deklarasyon yon sityasyon ijan nasyonal sou fwontyè 2 peyi yo pataje. Li pase lòd pou 1,500 sòlda Ameriken pran pozisyon sou fwontyè a. Responsab yo di gen plizyè milye lòt ki taka deplwaye anvan lontan.
