Prezidan Donald Trump mete fen Lendi nan pwogram pawòl imanite ki te benefisye Kiben, Nikawagweyen, Venezyelyen ak Ayisyen.
Dapre yon dekrè li pibliye ki pote tit: "Sekirize Fwontyè nou yo" ki detaye plizyè zak ki gen rapò ak imigrasyon, Prezidan Trump vize pran "tout aksyon apwopriye" pou konstwi yon miray sou fwontyè a. Li deplwaye tou militè Etazini sou fwontyè sid peyi a pou arete migran ilegal yo. Dekrè a mande tou pou elimine kèk pami pwogram pawòl imanitè yo.
Pami yo genyen CHNV (Kiba, Ayiti, Nikaragwa, Venezyela) ki te pèmèt yon afè 30,000 moun pa mwa ki soti nan peyi sa yo antre Ozetazini legalman epi rete nan peyi a pou jiska 2 zan si yo te gen yon moun kap viv Ozetazini pou sipòte yo finansyèman.
Apati mwad Desanm 2024, apepre 531,690 moun te antre Ozetazini anba pwogram sa a, dapre done ajans Dwan ak Pwoteksyon Fwontyè Ameriken an. Benefisye yo te oblije genyen yon paspò ki valid, fè aranjman poukont yo pou vwayaje Ozetazini, epi pase tchèk sekirite nasyonal, sekirite piblik ak lot bagay ankò.
Lamezonblanch te anonse pwogram pawòl la 5 Janvye 2023. Responsab administrasyon Biden nan te di nan epòk la ke inisyativ la te fè pati jefo gouvènman an pou dekouraje moun eseye chankre Ozetazini ilegalman an pasan pa fwontyè sid la.
Pwogram nan tèt koupe ak yon pwogram pou Ikrèn ki egziste deja epi youn anvan sa pou Venezyelyen.
Konsekans Imedya
Lod egzekitif la antre an aplikasyon tou suit. Savledi yo pap aksepte okenn nouvo aplikasyon nan men endividi kap eseye sponsorize migran sa yo.
Elizabeth Jacobs, ki travay pou Sant d Etid sou Imigrasyon, yon òganizasyon ki gen baz li nan Washington ki mande pou mete restriksyon sou moun kap chache antre Etazini, di VOA ke pou moun ki deja resevwa pawòl atravè pwogram sa a, yo ka pwobableman jwenn pèmisyon pou yo rete Etazini jiskaske peryòd pawòl la ekspire.
Pandansetan, Jacobs di endividi sa yo ap "san stati" epi riske depòtasyon.
Pwogram tankou CNVH sete yon fason pou Ameriken jwen sponsò legal epi viv an sekirite Ozetazini. Pami benefisye yo te gen alye Afghan yo dapre Nazanin Ash, PDG Welcome.US.
Cori Alonso-Yoder, pwofesè lwa imigrasyon nan inivèsite George Washington di: "Moun ki te gen pwoteksyon pawòl la anvan 20 Janvye pral oblije mande yon stati imigrasyon atravè yon lòt mwayen oubyen riske depòtasyon."
Dekrè prezidansyèl yo pa endike ke yo pral revoke pawòl la pou moun ki enskri nan pwogram nan deja, dapre Doris Meissner, ki travay pou Enstiti Politik Migrasyon nan Washington. Sepandan "yo sètènman papka renouvle li" dapre mamzèl.
Li fè remake ke si moun sa yo rete Ozetazini apre peryòd 2 zan an fin ekspire, yo pral tounen migran ilegal. Yo pral pèdi pèmisyon pou travay legalman e sa pral mete yo an risk pou yo depòte yo.
Pwogram pawòl la pat gen ladann mwayen pou benefisye yo jwenn rezidans pèmanan Ozetazini, ni vin sitwayen Ameriken. Sepandan, dapre avoka imigrasyon yo, benefisye yo kapab fè ajisteman nan stati imigrasyon yo de pwovizwa a youn ki pi pèmanan tankou pa egzanp yon viza oubyen mande yon fanmi ki gen rezidans yo spònsorize yo pou rezidans.
Apre yon ane Ozetazini, Kiben kapab aplike pou rezidans pèmanan dapre Lwa Ajisteman Kiben an. Venezyelyen ak Ayisyen kapab kalifye pou Stati Pwoteje Pwovizwa a (TPS) ki ba yo soulajman kont depòtasyon epi pèmisyon pou travay Ozetazini.
Yo kapab aplike tou pou azil, menm jan ak Nikaragweyen. Sepandan, fòk yo montre yon veritab pè pèsekisyon nan peyi natif natal yo ki baze sou ras, relijyon, nasyonalite, gwoup sosyal oswa opinyon politik.
Korespondan Imigrasyon VOA News Aline Barros ak korespondan imigrasyon VOA Espayol Salome Ramirez ekri vesyon orijinal repotaj sa a
