Prezidan Donald Trump revoke 17 enspektè jeneral endepandan kap travay nan divès ajans gouvènman an Vandredi. Mezi sa a elimine yon eleman siveyans kritik epi pare chimen an pou moun ki lwayal ak prezidan an ranplase yo.
Enspektè jeneral kap travay pou ajans tankou Depatman d Eta, Depatman Defans, ak Depatman Transpo Piblik resevwa kourye elektwonik Vandredi nan men direktè pèsonèl la pou di yo revoke efektiv imedyatman.
Revokasyon sa yo ta sanble vyole lwa federal Etazini ki mande pou prezidan an esplike tou le 2 chanm Kongrè a davans poukisa lap revoke yon responsab.
Lidè Demokrat Sena a, Chuck Schumer di mezi a taka vyole lwa peyi a e li dekri l tankou yon "purj". Senatè a prevwa yon "apwoch san fwa ni lwa" administrasyon Trump la.
Schumer di: "lè ajans gouvènman yo dezobeyi lwa peyi a nan ane kap vini an epi pa gen okenn enspektè endepandan pou kontrekare aksyon yo, Donald Trump taka byen regrete aksyon sa a."
Nan yon deklarasyon li voye bay VOA pa email, Patenarya pou Sèvis Piblik Ameriken an denonse revokasyon yo: "Enspektè jeneral yo se polisye ki anpeche move bagay rive. Yo idantifye e sispann gaspiyaj, fwod ak abi kap fèt toupatou nan gouvènman federal la. Travay yo fè sitwayen ki peye enpo yo ekonomize plizyè dizèn milye dola chak ane."
Oganizasyon Militan pwogresis Stand Up America kap travay pou konbat koripsyon deklare nan email li voye bay VOA: " Pij Prezidan Trump fè nan mitan lanuit montre kijan pwomès li te fè pou takle gaspiyaj ak abi nan gouvènman an se yon pwomès vid."
Senatè Repibliken Chuck Grassley, ki apiye enspektè jeneral yo di li ta renmen konnen poukisa Trump revoke moun sa yo.
"Petèt gen yon bon rezon pou revokasyon IG yo. Fok nou konnen. Mwen ta renmen resevwa plis esplikasyon sou deklarasyon prezidansyèl la."
Senatè Grassley di yo sipoze avèti Kongrè a 30 jou anvan mezi a antre an aplikasyon men sa pat fèt.
Lamezonblanch pat reponn demann ajans nouvèl Reuters fè pou komantè.
