Sekretè Deta Etazini Antony Blinken souliyen enpòtans pwoteksyon sivil Palestinyen ki mele nan lagè Izrayèl Hamas la, pandan yon konferans pou laprès nan Tel Aviv Vandredi 3 Novanm.
"Fòk nou pwoteje sivil Palestinyen yo pi plis. Nou di klèman ke Izrayèl ap mennen kanpay sa a pou kraze Hamas. Fason li fèl enpòtan. Li enpòtan paske se sa ki bon epi legal. Li enpòtan paske si yo pa fè sa, Hamas ak lòt gwoup teroris yo kapab pwofite pou tire avantaj. Pap gen okenn patnè pou lapè si yon katastwòf imanitè finn vale yo epi elwaye yo akoz sa moun pèsevwa tankou endiferans nou pa rapò ak tray yap pase.
Blinken te rankontre Premye Minis Benjamin Netanyahu Vandredi pou ankouraje l pwoteje sivil yo kont batay ki vize Hamas yo, nan moman twoup Izrayelyen yo ap ansèkle vil Gaza.
Nan pale li ak jounalis yo nan Tel Aviv, Blinken pale tou asistans pou moun Gaza yo.
"Fòk nou ogmante yon fason substansyèl livrezon asistans imanitè pou Gaza epi transpòte sitwayen Ameriken ak etranje soti nan Gaza. Depi antant nou fè ak Izrayèl, Ejipt ak Nasyonzuni sa gen 2 semèn pou mekanizm pou pèmèt asistans imanitè kòmanse rive jwenn sivil yo, nou ogmante livrezon nou yo. Nou komanse ak zero e kounyea gen 100 kamyon kap antre Gaza an pasan pa Rafah chak jou. Men li pa ase."
Pandansetan, lidè gwoup Hezbollah Libanè a deklare Vandredi ke gwoup ame li a ki puisan ap goumen kont Izrayèl pi plis ke jamè nan moman konfli a pran yon lòt dimansyon.
Hassan Nasrallah pwononse yon diskou moun tap tann depi lontan Vandredi. Se premye fwa li pran la pawòl depi komansman lagè Izrayèl Hamas la ki tanmen 7 Oktòb kòm repons kif kif Izrayèl pou yon atak yo te lanse kont Izrayelyen yo.
Nasrallah pa ale osi lwen pou l anonse ke Hezbollah antre konplètman nan lagè a men li di batay kap dewoule sou fwontyè Liban Izrayèl la pap limite a dimansyon li ye kounyea.
Yon lòt kote, Premye Minis Izrayelyen an, Benjamin Netanyahu ekate posibilite pou l ta respekte yon seselfe pwovizwa nan Gaza Vandredi. Misye di li pral pouse pou pi devan ak ofansiv militè a jiskaske Hamas lage tout otaj li kenbe yo.
Netanyahu te pran la pawòl yon ti tan apre li te rankontre Sekretè Deta Antony Blinken, ki te mande pou Izrayèl fè yon poz pwovizwaman nan atak li yo pou amelyore kondisyon imanitè yo nan Gaza.
Netanyahu deklare Izrayèl ap kontinye ak "tout pouvwa li" e li "derefize yon seselfe pwovizwa ki pa gen ladann retou otaj nou yo."
Hamas te kidnape apepre 240 moun nan atak li te lanse nan Izrayèl 7 Oktòb la.
Gen 1,400 moun ki mouri nan atak sa a, tandiske gen plis pase 9,200 Palestinyen ki mouri nan Gaza, depi atak Izrayelyen yo te kòmanse menm jou a, dapre done otorite la sante Palestinyen yo pibliye.