Manm gwoup K-Pòp popile BTS la, Jin, fini sevis milite li Mèkredi.
Vedèt K-Pòp la ki gen 31 zan te pati kite 5èm Divizyon Enfantri Lame a nan vil Yeoncheon, nan pwofens Gyeonggi. Kanmarad li yo, ki fè pati gwoup BTS la - J-Hope, RM, Jimin, V ak Jungkook te akeyi l.
Ajans gwoup la te mande fanatik yo pou yo pa al vizite lye a pou rezon sekirite. Emisyon ke medya Sid Koreyen yo difize an dirèk te montre manm gwoup la ap kwoke epi bo.
Jin sipoze patisipe nan BTS FESTA, ki se selebrasyon anyèl dat kote BTS te fè gran debi li, Jedi nan vil Seoul. Misye pral patisipe nan yon evenman kote li pral kwoke plizyè fanatik, dapre sa Big Hit Music fè konnen.
Manm BTS yo ta sipoze reyini konplètman nan ane 2025.
Dapre lwa peyi Kore di Sid, pi fò gason peyi a ki gen kapasite fizik pou fè sa, dwe sèvi pandan ant 18 ak 21 mwa nan lame peyi a.
