Lapolis Nasyonal Ayiti prezante, ayè jedi a, yon bilan de tout operasyon yo mennen pandan mwa novanm lan sou tout teritwa nasyonal la.
Nan Pòtoprens, pòt pawòl adjwen Lapolis la Lionel Lazarre, fè konnen PNH la entensifye operasyon l yo nan kapital la pou tabli lòd ak sekrite.
Nan kad operasyon yo mennen anba Dèlma a, lapolis rive arete plizyè prezime bandi ki fè pati kowalisyon "Viv ansanm" nan, gen plizyè lòt ki mouri nan boukantay kout zam ak lapolis.
Selon Lionel Lazarre, lapolis rive sezi tou 7 machin ak 3 motosiklèt, san konte pwodui ki sanble ak marijuana nan kad operasyon sa yo anba Dèlma a.
Yon lòt bò, Pòt pawòl la polis la mansyone plizyè lòt operasyon nan Pòtoprens kou vil pwovens yo, toujou nan lide pou kwape endividi ki gen men yo tranpe nan sa k pa sa
Nan Kenskòf, fòs lòd yo sezi machin ak zam. 4 bandi tonbe nan twoke kout zam ak lapolis.
Nan Delmas 33, ajan nan inite BLVV mennen yon operasyon nan yon klèb "Coin 33" kote fòs lòd yon arete 2 endividi epi sezi plizyè materyèl l sansib tankou inifòm lapolis ak radyo kominikasyon.
Kòmandman lapolis la pwofite salye kouraj polisye yo k ap mennen batay pou retabli lapè ak sekirite nan peyi.