Grenadye yo te bezwen yon match nil pou atenn objektif yo. Sepandan ak yon atak ki pa manje anyen frèt, Ayiti pase Sint Maarten 8 gòl, avèk 4 gòl chak mitan, pou ranpòte match la epi kalifye pou Gold Cup 2025 lan.
2 atankan ayisyen yo, Duckens Nazon ak Frantzdy Pierrot toufe defans Sint Maarten an. A yo 2 a, yo 5 gòl.
Frantzdy Pierrot fè yon triple, tandiske Duckens Nazon fè yon dekabès pou sekirize 3 pwen viktwa seleksyon nasyonal Ayiti a.
Lòt gòl yo se zèv Christopher Attys, Markhus Duke Lacroix et Mondy Prunier.
Ak viktwa konvenkan sa, Ayiti asire l lap fini nan tèt gwoup C a, sa ki vle di tou Ayiti remonte nan Lig A lig nasyon yo pou zòn Concacaf la.
N ap souliye Grenadyè yo fè 5 viktwa youn kole lòt. Yo fè 26 gò e yo pran sèlman 5 gòl.
Duckens Nazon fè 9 gòl an tou nan lig nasyon yo. Asosye l nan atak la, Frantzdy Pierrot fè filè yo tranble 6 fwa.
Ayiti ap jwe dènye match li lendi 18 novanm lan kont seleksyon Pòtoriko a. Match la ap kòmanse a 7è tapan.