Selon chif Direksyon jeneral imigrasyon kominike, Sendomeng depòte 19,592 Ayisyen. Yo rapatriye 11,329 lòt. Sa ki bay 30,921 Ayisyen Sendomeng pimpe voye tounen Ayiti nan mwa oktòb la.
Otorite nan Repiblik Domininikèn tanmen, nan mwa oktòb la, yon operasyon gason pa kanpe kont Ayisyen san papye sou teritwa yo.
Akoz operasyon sa yo ki blayi toupatou nan Sendomeng, gen 10,105 Ayisyen ki oblije mare pakèt yo epi tounen lakay yo Ayiti san bri san kont.
Autou, 41,026 Ayisyen ( depòte, rapatriye ak tounen volontè) travèse fwontyè a pou antre Ayiti nan mwa oktòb la.
Yon lòt bò, selon sa Imigrasyon dominiken fè konnen, pou ane 2024 la Sendomeng depòte 131,741 Ayisyen epi rapatriye 81,384 lòt. Sa vle di Repiblik Domininikèn pimpe Ayiti plis pase 213 mil migran ayisyen pou ane 2024 la.
Imigrasyon ajoute gen 173,800 Ayisyen ki deside mete vwal nan do yo poukont yo pandan menm peryòd la.