Anpil nan migran yo "viktim rakèt ak vyolans tout kalte" selon sa GARR fè konnen nan yon kominike li pibliye ayè mèkredi 23 oktòb la.
Òganizasyon k ap defann dwa moun nan pwofite denonse move tretman Ayisyen yo ap sibi nan moman depòtasyon an mas sa yo.
Selon GARR, Medam Ayisyèn yo viktim agresyon seksyèl ak maltretans fizik. Menm tifi minè pa epanye.
GARR rapòte "Gen tifi minè ki sibi vyòl anba men ajan migrasyon dominiken".
Yon sitiyason ki dekri yon tablo tris de sa Ayisyen ap sibi kay vwzen.
Depi lè Prezidan Luis Abinader fin anonse plan l pou depòte 10 mil Ayisyen chak semèn, ajan imigrasyon dominiken mennen operasyon tout kote nan Sendomeng pou arete epi depòte Ayisyen.
Soti premye pou rive 22 oktòb, gouvènman dominiken an depòte 19701 Ayisyen, selon GARR.
"Nou kondane ak tout fòs nou depòtasyon masif sa yo ki vyole konvansyon entènasyonal ak akò sou rapatriman Ayiti siyen ak dominikani" enstitisyon defans dwa moun nan denonse nan kominike li a.
