Plis pase 10,000 Ayisyen oblije kouri kite kay yo nan semèn ki sot pase a akoz gang ame kap opere andedan ak ozalantou kapital la, Pòtoprens ogmante atak yo nan zon yo poko kontwole. Se sa ajans migrasyon LONU an deklare Jedi.
Ajans la di nan komansman mwad Septanm nan, plis pase 700,000 te kouri kite kay yo toupatou nan peyi a. Chif sa a prèske doub sa yo te anrejistre sa gen 6 mwa desa.
Nan semèn ki pase a, gang yo ogmante atak yo sou yon seri vil andeyò kapital la kote alyans gang ki rele Viv Ansanm nan rive kontwole pi fò Pòtoprens ak banlye yo. Viv Ansanm rasanble yon gwoup gang ame vyolan.
Konfli gang yo lakoz ensekirite alimantè a ogmante nan moman gang yo pran kontwòl zon agrikòl yo epi bloke wout transpò yo. Sa lakoz anpil moun oblije kouri kite kay yo - pa fwa yo konn al viv ak fanmi - lòt fwa yo kreye kan nan lari. Men tou sa lakoz yo pa gen sous revni stab pou achte manje.
Tandiske LONU otorize yon fòs entènasyonal pou l vin Ayiti pou ede lapolis reprann kontwòl kapital la nan men gang yo, misyon an manke resous e li pa pwodui anpil rezilta.
Lidèship Ayiti mande pou yo konvèti fòs la an misyon mentyen lapè ofisyèl pou ogmante resous li yo, ki se yon inisyativ Lachin ak Larisi te bloke mwa pase a.
Gang ki te konn vize polis nasyonal la anvan, gwoup defans sivil yo ak enfrastrikti leta kòmanse atake machin etranje tou kounyea.
Anbasad Etazini an Ayiti di Reuters ke Lendi 2 pami machin blende li yo fè fas ak kout zam gang yo. Youn nan blende yo sibi domaj men pèsonn pa mouri ni blese.
Yon elikoptè LONU ki te gen 18 moun abò li te sibi atak gang yo tou epi plizyè bal te frape li Jedi. Pèson pat blese, dapre sa Miami Herald rapòte.
Biwo Nasyonzuni an Ayiti pat reponn demann Reuters te fè pou plis enfòmasyon sou ensidan an.
