Lamezonblanch pibliye yon kont randi konvèsasyon telefòn Prezidan Joe Biden te genyen ak Premye Minis Izrayelyen Benjamin Netanyahu maten an.
Dapre nòt li voye bay jounalis yo e nap site: Prezidan Biden mete aksan sou le fèt ke atak kont travayè imanitè yo ak sityasyon imanitè a an jeneral nan Gaza pa akseptab. Li deklare klèman bezwen ki egziste pou Izrayel anonse aplikasyon yon seri mezi konkrè presi e mezirab pou pwoteje sivil yo anpeche soufrans imanitè epi sekirize travayè imanitè yo. Li di klèman ke evalyasyon nou de mezi imedya Izrayel pran sou etap sa yo pral detèmine politik Etazini pa rapò ak Gaza. Li souliyen ke yon seselfe imedya esansyèl pou amelyore sityasyon imanitè a epi pwoteje sivil inosan. E li ankouraje Premye Minis la pou l bay negosyatè li yo pouvwa pou finalize yon antant san pèdi tan pou otaj yo ka tounen lakay yo."
Sekrete d Eta Ameriken Antony Blinken pandan yon konferans pou lapres apre yon rankont minis afe etranje LOTAN yo nan Brusel, Beljik, 4 Avril 2024.
Sekretè d Eta Antony Blinken pale sou frap Izrayelyen an nan diskou li pwononse jodia a l okazyon 75em anivèsè LOTAN nan katye jeneral li nan Brusèl, Bèljik:
"Byen antandu sak te pase apre 7 Oktòb la te ka fini imedyatman si Hamas te sispann kache dèyè sivil, lage otaj yo epi depoze lèzam. Men Izrayèl pa Hamas. Izrayèl se yon demokrasi. Hamas se yon òganizasyon teworis. E demokrasi valorize lavi kretyen vivan pi plis. Lavi tout kretyen vivan. Jan nou konn di l moun ki sove yon vi sove mond lan. Se fòs nou e se sak fè distenksyon ant noumenm ak teworis yo. Si nou pèdi respè pou lavi kretyen vivan pa gen diferans ant noumenm ak teworis yo. "
Repons Izrayel
Lame Izrayel deklare Jedi li pwal pibliye “tale konsa” anket li mennen sou frap ki te fet sou yon konvwa ONG World Food Kitchen ki touye 7 travaye imanitè.
Amiral Daniel Hagari deklare anket la dewoule yon fason kle e transparan.
"Jodia nou prezante anket sou ensidan grav kote anplwaye World Food Kitchen te mouri trajikman. Se yon oganizasyon ki konsakre tèt li pou fe byen, bay moun ki nan bezwen nan Gaza yo manje. Li te bay sitwayen Izrayel manje apre 7 Oktob. Nou te mennen yon anket an detay.”
Gen plis pase 33 mil Palestinyen ki mouri nan konfli Izrayelo-Hamas la ki la depi 6 mwa. Gen plis pase 75,600 lòt ki blese dapre chif ke Ministe Sante Gaza a pibliye Jedi.
Ministè a pa fè diferans ant lanmò sivil ak konbatan nan chif li pibliye yo men li di fanm ak timoun reprezante 2 tyè nan viktim yo.
Mekredi swa, Minis Defans Etazini Lloyd Austin te di tokay Izrayelyen li ke frap kote Izrayel di li te vize travaye imanitè yo pa erè, sa ranfose kè-sote Etazini genyen sou plan Izrayel genyen pou lanse yon ofansiv atè nan sid Gaza. Austin di fok Izrayel fè plis efò pou pwoteje lavi sivil ak travayè imanite ki nan zonn lagè a.
Pandansetan, Nasyonzini di pifò popilasyon rejyon nò Gaza prèt pou mouri ak grangou.
Isit Ozetazini, Prezidan Joe Biden ap fè fas ak pwotestasyon pou konfli Gaza a. Vrèman vre, li te konfwonte ak youn andedan Mezonblanch semen sa a.
Reyakzyon Mizilman Ameriken
Sete pandan yon rankont prive Madi kote Biden, vis presidan Kamala Harris ak responsab sekirite nasyonal Etazini yo tap tande kè-sote Mizilman Ameriken yo pa rapò ak lagè Izrayel ak Hamas la.
Yon ti tan apre konvesasyon an te tanmen, yon doktè Palestinyen Ameriken ki rete Chicago ki travay kom volontè nan Gaza te anonse lap vire do li.
Anvan li te pati kite rankont la Thaer Ahmad te prezante bay prezidan an let yon tifi 8 an ki pèdi paran li e kap viv nan Rafah. Lèt la te gen yon foto avè l. Ahmad Biden te bay yon repons an soudin.
"Donk mwen te leve epi eskize m epi m di mwen ta renmen bawou let sa a ke yo tifi 8 an ekri. Li rele Hadeel. Li rete anba yon tant nan Rafah. Kounyela a. Li se yon orfelen e li se moun Khan Yunis e li pedi kay li ak tout manm fanmi li. Epi nan lèt la, timoun nan ap soupriye prezidan an esansyelman pou asire ke yo pa anvayi Rafah paske li pè anpil pou sa pa rive. Donk mwen te vle remet Biden foto li tou. Li gade foto a e li di li konprann. Donk apre sa mwen kite sal la.”
Apui Biden pou operasyon militè Izrayel nan Gaza – ak lavant zam Ameriken – soulve kolè nan mitan Mizilman Ameriken yo.
Lagè a te tanmen 7 Oktob apre yon atak sipriz Hamas ki te touye 1,200 Izrayelyen, dapre chif ke Izrayèl te bay.
Se Mezonblanch ki te oganize rankont ak Mizilman yo – yon dine pou selebre fen mwa Ramadan an. Plizyè lidè kominitè Mizilman te refize envitasyon an paske yo di li pa apwopriye nan moman kote anpil moun ap mouri grangou nan Gaza.
Korespondan VOA nan Lamezonblanch Anita Powell kontribye a repòtaj sa a