Otorite migrasyon Meksiken yo di Lendi yo arete 246 migran ki te kanpe nan yon stasyon otobus prensipal nan no vil Meksiko Siti - pami yo omwens 50 timoun ke yo mete anba sipevizyon sèvis sosyal yo.
Meksik konstate yon gwo ogmantasyon nan kantite migran kap travèse peyi a sou wout pou y al sou fwontyè Etazini an. Otorite Ameriken yo arete yon chif reko migran pandan ane ki pase a. Anpil nan moun sa yo kouri kite peyi yo akoz zak vyolans ak kondisyon ekonomik dezespere lakay yo.
Nan yon deklarasyon li pibliye, ajans migrasyon Meksik la, INM fè konnen dènye gwoup migran sa a te rasanble ozalantou ban, twotwa, espas ouvè ak korido tèminal otobis la.
Migran yo soti Amerik Santral, Venezyela ak Ayiti. Otorite yo arete yo pandan tchèk migrasyon yo te fè ant Vandredi ak Dimanch pase a sou demann otorite lokal yo, dapre sa INM fè konnen.