Militan dwazimen siryen fè konnen fòs sekirite siryèn yo touye 11 moun e blese plizyè douzèn lòt nan nòwès peyi a, pandan Nasyonzini, li menm, fè konnen bilan moun ki pèdi lavi yo nan plizyè mwa rebelyon k ap sakaje Siri a rive kounye a nan 5 mil.
Obsèvatwa Dwazimen siryen an, ki gen katye-jeneral li nan vil Lond (Angletè) presize ke dènye viktim yo fèt nan pwovens Idlib---yon zòn “redonn” toupre fwontyè Siri pataje ak Turki a.
Antretan, komisè Dwazimen l’ONU an, Navi Pillay, deklare biwo li a resevwa enfòmasyon ki sòt nan diferan sous li kapab fè konfyans ki endike kantite moun ki mouri nan rebelyon siryèn nan (depi mwa mas ane sa a) pwobableman depase 5 mil mò.
Madan Pillay pibliye rapò sa a tousuit apre yon chita-tande ak kèk reprezantan Konsèy Sekirite l’ONU an nan Nouyòk, kote li di yon tribinal entènasyonal ta dwe panche l sou vyolans nan Siri a.
