Lig Arab la prepare yon lis sanksyon kont Siri kote bilan moun ki mouri nan represyon kont disidan yo kontinye ogmante.
Diplomat Lig Arab la te reyini samdi nan peyi Egypt pou anvizaje kèk sanksyon kont peyi Siri apre Damas pa okipe dat limit gwoup la te fikse pou l aksepte obsèvatè entènasyonal sou tèritwa li pou suiv evolisyon sityasyon an. Minis afè etranjè Lig dwe resevwa dimanch pwopozisyon an pou yon posib ratifikasyon.
Samdi diplomat yo te dakò sou yon lis sanksyon ki kapab touche vòl avyon peyi Arab yo nan direksyon peyi Siri epi blokaj tranzaksyon komèsyal e bankè ant Damas ak rès kapital arab yo.
Nan Koumansman mwa novanman nan Lig Arab la te sispann Siri kòm peyi manm apre Damas te refize mete ann aplikasyon yon plan Gwoup la pwopoze e ki gen pou objektif mete yon pwen final nan operasyon sere-boulon gouvènman an kont disidan yo.
Ajans nouvèl France-Presse fè konnen minis afè etranjè siryen an, Walid Muallem, akize Lig la deske lap entènasyonalize kriz antigouvènmantal ka p sakaje peyi li a.
Militan siryen yo di fòs sekirite siryen yo touye omwen 5 kretyen-vivan nan yon seri desant-de-lye yo fè samdi. Dapre menm sous sa a, 27 moun pèdi lavi yo pou sèl vandredi ki pase a nan manifestasyon kont gouvènman an--pami yo, 10 manm fòs sekirite yo ki mouri nan afwontman ak dezètè lame siryèn nan.
Gouvènman an lage responsablite pi fò rebelyon an a sou do "teworis". Reinyon Lig Arab la nan Kèr samdi 26 novanm nan rive apre Damas pa okipe dat limit gwoup 22 nasyon an te fikse pou l pèmèt obsèvatè entènasyonal rantre nan Siri.
Nan koumansman mwa sa a, Lig Arab la te sispan Siri kòm manm apre Damas pat mete ann aplikasyon yon plan ki te gen pou objektif mete yon fen nan operasyon sere-boulon gouvènman an kont opozisyon an.
Sa fè 8 mwa depi manifestan ap desann nan lari pou reklame demisyon prezidan siryen an, Bashar al-Assad.
Nasyonzini fè konnen depi mwa mas---mwa ki make koumansman manifestasyon opozisyon an deklannche kont gouvènman an---plis pase 3 mil 500 moun pèdi lavi yo nan Siri.
