Diplomat Inyon Ewòp la anonse peyi manm yo dakò pou ranfòse sanksyon yo kont Siri, kèk moman apre Komite Lig Arab te mete sou pye pou aplike sanksyon ki vize sektè enèji siryen an ---yon sektè ki rich e pisans.
Responsab ewopeyen yo di yo mete 11 lòt konpayi ak 12 nouvo pèsonalite sou yon lis nwa. Moun ki sou lis sa a pap ka vwayaje sou kontinan ewopeyen an ni gen aksè a byen yo posede. Mezi sa yo se pou fòse gouvènman siryen an sispann represyon l ap pratike sou manifestan k ap pwoteste kont rejim siryen an.
Komite Lig Arab la ki reyini nan vil Kèr pibliye yon lis 17 pèsonalite siryen ki pap kapab vwayaje al nan peyi Arab. Pami yo, genyen frè prezidan siryen an, Bashar al-Assad---òm dafè ki pi rich nan Siri--- ansanm ak prensipal manm kabinè ministeryèl la.
Toujou konsènan sanksyon: Inyon Ewòp la deside kore tou saksyon ekonomik yo kont Iran akò pwogram nikleyè repiblik islamik la. Minis afè etranjè Inyon an ki reyini nan vil Brussèl (Beljik) aksepte pou yo ogmante kantite eleman ak antrepriz y ap mete anba nouvo sanksyon yo. Yo dakò tou pou anvizaje plis penalite toujou nan lavni kont sektè transpò ak sektè enèji a---2 sektè enpòtan pou ekonomi iranyèn nan.
Diplomat ewopeyen yo di 180 gwo responsab iranyen ak konpayi pral tonbe anba nouvo sanksyon yo.
Puisans oksidantal yo sispèk Iran ap eseye fabrike yon zam atomik malgre Iran demanti pwogram nikleyè pa genyen objektif militè men pito yon objektif sivil, kidonk, pasifik.
