Lèzetazini ak Lalmay fè konnen Konsèy Sekirite Nasyonzini an dwe reyaji kont operasyon sere-boulon gouvènman siryen an lanse kont manifestan k ap pwoteste, apre yon anketè l’ONU bay anpil detay sou abi grav manm lame a te komèt sou lòd otorite wo-plase nan rejim prezidan Bashar Al-Assad la.
Anbasadris Lèzetazini nan Nasyon Zini an, Susan Rice -ki t ap pale de sitiyasyon an lendi 29 novnam 2011 la- deklare desizyon Lig Arab la fèk pran pou l enpoze sanksyon sou Siri a, kapab genyen enfliyans sou deba k ap fèt sou dosye a nan l’ONU.
Diplomat ameriken an di :
"Puiske kounyela a Lig Arab la pase alaksyon, l ap vin pi klè chak jou –menm pou moun ki ta vle fèmen je sou sa- l ap vin pi klè ke rejim Assad la patisipe nan zak kriyèl e revòltan, e gen dokiman kounyela a pou pwouve atwosite sa yo. Pasyans vwazen Siri yo ak kominote entènasyonal la deja rive nan bout li; e nou panse li lè, li tan pou n kòmanse mande tèt nou, isit la nan Nouyòk, kisa nou dwe fè sou sa."
Yon komisyon l’ONU ki mennen ankèt sou akizasyon deske Siri komèt gwo vyolasyon dwa moun, blame twoup gouvènmantal peyi sa a poutèt yo komèt egzekisyon san jijman, arestasyon gwo ponyèt, kidnaping ak disparisyon fòse, zak kraze-zo, vyolans seksyèl avèk vyolasyon dwa timoun. Rezilta ankèt la genyen pou l ale jwenn Konsèy Dwa Moun l’ONU an ak Asanble Jeneral la, 2 antite ki va deside kisa òganizasyon mondyal la dwe fè apre sa kòm reyaksyon.
