Dana White, yon pèsonalite nan espò konba epi patizan Donald Trump, pral rantre nan konsèy administrasyon Meta (Facebook, Instagram, WhatsApp), youn nan jeyan teknoloji yo k ap chèche atire favè prezidan eli Etazini an.
"Map di sa byen klè, mwen pa t janm enterese patisipe nan yon konsèy administrasyon jiskaske yo pwopoze m rantre nan Meta. Mwen gen fèm konviksyon rezo sosyal yo ak Entelijans Atifisyèl se lavni an," se sa Prezidan UFC a, lig ki pi prestijye nan mond MMA (Atizay masyal melanje), te deklare nan yon kominike Meta.
"Pa gen anyen mwen renmen plis pase konstwi mak, e mwen swete ede Meta anpil nan pase nan nivo siperyè a," li ajoute.
Alye aktif Donald Trump, Dana White te kontribye anpil pou fè Trump vin popilè nan mitan jèn gason ki renmen espò konba.
Li te parèt nan yon videyo TikTok kandida repibliken an e li ankouraje li, dapre laprès ameriken, pou li eksprime tèt li nan pòdkas tankou sa Joe Rogan, ki trè ekoute pa elektora kle sa a. Epi lè Donald Trump te fè diskou viktwa li 6 novanm, Dana White te sou sèn nan.
De lòt moun, John Elkann, patron Exor (fon envestisman Ewopeyen) ak Charlie Songhurst (envestisè ak ansyen gwo responsab Microsoft), te eli nan konsèy administrasyon Meta tou. "Dana, John ak Charlie pral pote yon ekspètiz ak yon pèspektiv pwofon ki pral ede nou sezi gwo opòtinite k ap vini ak Entèlijans Atifisyèl, akseswa konekte ak avni koneksyon moun ak moun," se sa Mark Zuckerberg, fondatè ak patron Meta, te deklare.
Dana White se tou yon zanmi Mark Zuckerberg, ki pratike atizay masyal.
