Divès operasyon Lapolis Nasyonal Ayiti (PNH) ap mennen nan depatman Latibonit "montre gen anpil espwa" pou kraze gang Gran grif la, selon Venson Francois, ki se komisè gouvènman Senmak.
Nan yon ti pale li te fè ak yon repòtè VOA, komisè gouvènman an fè konnen gen anpil espwa bò kote otorite yo ki kontinye ap mennen operasyon nan depatman Latibonit lan nan lide pou dechouke gang gran grif la ki responsab plizyè zak briganday nan kanton an, ladan yo masak Ponsonde a.
Venson Francois rekonèt ane 2025 lan se yon ane konba li ye. Pi lwen, komisè gouvènman envite popilasyon an rete pozitif, paske operasyon fòs lòd yo ap kontinye pou ka rive kraze fwaye gang yo nan peyi a, pou Ayiti ka reprann eskanp machwè i.
N ap fè sonje, gwoup gang gran grif la ki gen nan tèt li Luckson Elan, lanse plizyè atak kont popilasyon an nan Latibonit, sitou Ponsonde kote yo te touye plis pase 100 kretyen vivan.
N ap souliye tou, pou ane 2024 la vag vyolans yo koz lanmò plis pase 5000 moun, selon yon rapò Nasyonzini.
