Chèf twoup miltinasyonal la fè deklarasyon sa yo, nan moman 150 nouvo sòlda (ladan yo 19 fanm) ki soti Guatemala te ateri nan Ayopò Toussaint Louverture, pou vin ranfòse misyon miltinasyonal la.
Nan diskou li, Godfrey Otunge voye yon piga bay gwoup gang yo e pwomèt bandi yo pral fè eksperyans ak fòs konplè MMS la talè konsa.
Pi lwen, chèf MMS la bay gwoup nèg ak zam yo 2 chwa: rann tèt yo bay lapolis epi remèt zam yo, oubyen goumen ak MMS la epi jwenn ak zo grann yo.
Otunge fè konnen, sòlda li yo prepare e y ap kontinye prepare pou kwape gang yo nan peyi a.
N ap fè sonje, atak gang yon nan peyi a fòse plis pase 700 mil moun kouri kite lakay yo pandan ane 2024 la, san konte plizyè milye lòt ki mouri akoz ensekrite a.
Chèf kenyan an kwè nouvo polisye sa yo ki vin entegre misyon miltinasyonal la ap amelyore kapasite MMS la nan batay l ap menmen kont gang yo.
Godfrey Otunge pwofite remèsye peyi Guatemala pou sipò li anvè MMS la ak pèp ayisyen an
N ap souliye, peyi Salvador voye 8 polisye an Ayiti pou vin prepare teren an pou lòt sòlda ki gen pou antre nan peyi a.
