Rapò a ke gwoup Inisyativ Global Kont Krim Òganize Transnasyonal pibliye Lendi semèn sa a di gang yo fè biznis prive, yo fè chantaj kont senp sitwayen ak fanmi epitou sèvi ak kidnapping pou yo ka gen mwayen pou yo ka achte zam epi fè pèman pou solda yo.
"Gang yo ap evolye yon fason radikal. Yo te kòmanse antanke aktè san okenn strikti ki te depann de resous piblik oubyen patwon prive yo, kounyea yo tounen antreprenè vyolan.
Rapò a kontinye pou di "kounyela a antite sa yo gen plis endepandans ekonomik ak tèritwa, sa ki rann ni pi difisil pou kontwole yo." Rapò a site entevyou li fè ak politisyen ki pat vle pou yo bay non yo, lapolis, anplwaye ONG, biznisman ak senp sitwayen.
Rapò a di reyalite sa a poze yon miryad defi pou fòs entènasyonal LONU apiye a ke moun ap tann depi lontan.
Gouvènman Ayisyen an ki pa eli (Defakto) te mande asistans fòs la pou apiye polis nasyonal (PNH)la ki pa gen ase resous epi soulaje kriz imanitè a. Demann sa a te fèt an Oktòb 2022.
Ane pase LONU te ratifye yon rezolisyon ki otirize fòs la, men poko gen okenn enfòmasyon sou dimansyon fòs la ni kilè li pral deplwaye an Ayiti.
Dapre rapò a, gang yo egzije biznis yo peye jiska $20,000 pa semèn ansanm ak pousantaj sou kontenè yo resevwa epi menm pa fwa mande yo ede fè aranjman pou livrezon zam olye pèman lajan kach.
Gang yo tabli tou plizye pòs sou wout kapital la nan teritwa yo kontwole kote yo koleksyone yon afè $8,000 pa jou.
Rapò a di jefò sa a "biwokratize anpil" e ke gen gang ki menm distribye kat chak semèn pou tcheke moun kap travèse yo pi vit.
Rapò a ajoute ke swadizan endistri "kidnapping" lan antre apeprè $25 milyon pa an, si w pran an konsiderasyon nouvo tandans yo ki se kidnappe gwoup moun kap vwayaje nan kamyonèt(TapTap) yo.
