Donald Trump ranpòte yon lòt viktwa nan kokis Repibliken ki te dewoule nan zil Vyèj Ameriken yo, kote otorite yo pat okipe plizyè règ pati Repibliken an - pami yo òganize vòt pi bonè pase sa yo dwe fè.
Kokis Jedi 8 Fevriye a sete 3èm konpetisyon Repibliken kote ki te gen delege an je.
Elektè nan Sent Kwa, Sen Toma ak Sen Jean t al nan divès lye - pami yo yon bar kote yo vann bwason alkowolik ki fèt ak wòm, pou chwazi moun yo vle pou reprezante pati a nan eleksyon prezidansyèl la.
Responsab pati Repibliken yo nan Zil Vyèj yo di yo te deside òganize konkou a bonè pou asire teritwa Ameriken an te jwe yon wòl enpòtan nan nominasyon yon kandida.
