FC Fleury fè yon festival kont ekip Saint Étienne (6-0) vandredi (17 Janvye a), gras ak yon Batcheba Louis an penpan ki fè twa gòl.
Entènasyonal ayisyèn nan fè premye triple l nan D1 Arkema a, pou l ede FC Fleury kase met nan men Saint Étienne nan kad 13èm jounen chanpyona Lafrans lan.
Se atakan ayisyèn nan ki te ouvri eskò a nan 17èm minit match la. Bitez ayisyèn nan drible gadyèn Saint Étienne nan avan l foure boul l la nan kan an.
Nan 2è mitan an, Batcheba Louis fè 2 lòt gòl pou l reyalize premye triple l nan chanpyona a.
Yon bèl prestasyon Grenadyè reyalize ki pwopilse FC Fleury nan 4è plas klasman chanpyona a.
Nan deklarasyon apre match, Grenadyè a felisite tout ekip Fleury a e fè konnen tout ekip la "te byen prepare match la".
Ak 4è plas la, FC Fleury gen nan pòch li yon plas playoffs
Sepandan pou Batcheba Louis, "travay la poko fini, paske ret yon pakèt match".
Grenadyè a ap retounen sou teren ankò kont ekip Toulouse la 26 janvye 2025 nan 8è final koup Lafrans