Mitch McConnell, Repibliken pi wo plase nan Sena Etazini deklare majorite Repibliken Sena a pral reprezante yon baryè sekirite enpòtan pou peyi a.
McConnell di jounalis yo Mèkredi: "Se yon bon jounen pou GOP a [Pati Repibliken an]".
Pati Repibliken an reprann kontwol Sena a ak omwens 51 syèj sou yon total 100 nan eleksyon Madi a. Kontwòl Chanm Depite a, ke Repibliken yo kontwole aktyèlman, poko deside.
Tou le 435 syèj nan Lachanm yo te an je nan eleksyon toupatou Ozetazini pou mande 2 zan, tandiske 34 sou 100 syèj nan Sena a te an je pou manda ki dire 6 zan.
Anvan jounen eleksyon an, Demokrat yo te gen yon majorite tou mens Sena a tandiske Repibliken yo te kontwole Chanm Depite a. Viktwa kle Repibliken yo ranpote nan eleksyon pou Sena nan Vijini de Lwès epi Ohio mete yo nan yon bon pozisyon pou yo genyen majorite a.
Nan Lachanm, Repibliken yo te gen yon avantaj 220-212, epi 3 syèj ki te vid. Kontwòl Lachanm poko konfime. Malgre nou ka pa konnen rezilta yo pandan plizyè jou, paske Kalifoni konn pran plizyè jou pou konte bilten yo, gen posibilite tou pou moun konteste rezilta yo nan kous ki sere anpil yo e sa ka pran plizyè semèn pou rezoud.
Yon majorite Repibliken nan Sena a taka mete an danje asistans pou Ikrèn nan lagè li ak Larisi nan lavni.
McConnell, ki souvan defye kanmarad li yo nan Sena a pou apiye asistans sa a reitere enpòtans li Mèkredi.
McConnell di: "li kapab sanble yon politik granmoun pou kèk moun men mwen toujou yon Repibliken nan stil Ronald Reagan ki kwè wol Etazini nan mond lan absoliman endispansab, menm si ou gen kè sote pou pri a."