Trump bat rival Demokrat li Kamala Harris. Viktwa sa a reprezante yon retou istorik ansyen prezidan an sou sèn politik la apre li sot pase 4 an depi li te kite mezon blanch la apre defèt li devan prezidan Joe Biden an 2020.
Byen bonè Mèkredi, anpil lidè nan mond lan sou rezo sosyal X te felisite Trump.
Trump gen yon apwòch politik etranjè enprevizib "America First " sa ki te konplike relasyon ak anpil alye ameriken ak ènmi pandan premye manda li nan biwo oval la.
Premye Minis Izraelyen Benjamin Netanyahu se te youn nan premye alye Ameriken, ki te voye yon mesaj sipò. Li fè lwanj pou "retou istorik" Trump la. Li di li sa ofri yon "re-angajman pwisan gwo alyans ant Izrayèl ak Etazini."
Prezidan Ikrenyen an Vladimir Zelenskyy, ki te mande Etazini ak peyi Lwès yo plis sipò pou konbat envazyon Larisi a, te pale pozitivman, li di Trump angage pou 'lapè atravè mond la.
Zelenskyy te di "Sa a se egzakteman prensip ki ka pratikman pote lapè nan Ikrèn pi rapidman. "
Chèf Òganizasyon Trete Nò Atlantik LOTAN - alyans militè Lwès la ke Trump te kritike lontan paske peyi sa yo pa fè ase pou pran swen defans Ewòp la - te felisite Trump nan yon mesaj.
Mark Rutte, Sekretè Jeneral Òganizasyon Trete Nò Atlantik la te di “Lidèchip li a pral ankò kle pou kenbe Alyans nou an solid. Mwen espere travay avèk li ankò pou avansman lapè atravè fòs #LOTAN.”
Prezidan fransè a, Emmanuel Macron tou, te rapidman felisite Trump epi di ke li "pare pou travay ansanm jan nou te fè pou 4 ane de sa."
Premye Minis Britanik la Keir Starmer te di ke gouvènman li an kanpe "zepòl a zepòl" nan sa ki gen pou wè ak defans valè libète, demokrasi ak antrepriz.
Ursula von der Leyen, prezidan Komisyon Inyon Ewopeyen an, te di ke li "felisite anpil" Trump epi li fè lwanj pou "patenarya" Etazini ak Inyon Ewopeyen an .
Pandan premye manda Trump a, friksyon te eklate ant Inyon Ewopeyen an ak Etazini an, an pati akoz enpozisyon Trump pou tarif li te mete sou ekspòtasyon Ewopeyen.
Premye Minis Ongwa, Victor Orban, yon alye konsèvatif Trump, te di viktwa Trump la "pi gwo reaparisyon nan istwa politik Etazini" e li te di se "yon viktwa ki nesesè anpil" pou mond lan.
Prezidan Ris Vladimir Putin pa fè kòmantè sou rezilta eleksyon ameriken yo. Men, sou X, ansyen Prezidan Ris Dmitry Medvedev te kontan defèt aparan Harris la, li di "Kamala fini...."
Lidè Azyatik yo te kòmanse voye mesaj felisitasyon tou.
Premye Minis Ostralyen Anthony Albanese te di, "Ostralyen ak Ameriken yo se gwo zanmi ak vrè alye."
Premye Minis Endyen an, Narendra Modi, te fè Trump "konpliman" li te rele zanmi l.
Modi te di: "Pandan ou pral kontinye siksè premye manda ou a, mwen espere nou gen bon jan kolaborasyon pou ranfòse plis" relasyon Etazini ak End .
Nan yon deklarasyon, Prezidan Filipin Ferdinand Marcos Jr. te eksprime espwa ke "alyans" ant Washington ak Maniy, "pral yon fòs ki pral klere yon chemen pwosperite ak amityé, nan rejyon Pasifik la."
