Yon stasyon televizyon Arab ki gen baz li nan Beirout, kapital peyi Liban fè konnen frap ayeryen Izrayèl lanse nan sid Liban lakoz 2 nan jounalis li yo ki tap fè repotaj sou vyolans la sou fwontyè ak Izrayèl la pèdi lavi yo.
Al-Mayadeen TV deklare korespondan Farah Omar ak kameraman Rabih Maamari mouri Madi pandan yon tap kouvri aktivite militè sou fwontyè Liban pataje ak Izrayèl la.
Stasyon televizyon sa a gen lyen politik ak gwoup militan Libanè Hezbollah a ki di li te lanse yon atak ak misil kont rejyon no Izrayèl kom reprezay.
Yon lot kote, yon responsab Palestinyen ak yon responsab sekirite Libanè deklare gen 4 manm Hamas ki mouri nan yon frap Izrayelyen separe.
Gwoup Hamas la ap fè lagè ak Izrayèl e li gen yon gwo prezans nan Liban.