Lòd la valab pou jous 24 Oktòb e li vini apre youn nan pati opozisyon politik yo ak 2 Kenyan ki di desizyon pou deplwaye polisye andeyò peyi ès Afriken an ilegal.
Dapre dokiman yo depoze devan tribinal la, ke ajans nouvèl Reuters wè, lòd la entèdi responsab gouvènman Kenyan an - pami yo prezidan an ak minis enteryè li a pou yo "deplwaye polisye an Ayiti ou okenn lòt peyi, pou jous 24 Oktòb 2023."
Nan mwa Jiyè a, Kenya te pwomèt pou l kontribye 1,000 polisye nan fòs miltinasyonal pou Ayiti a, apre peyi d Ayiti te mande asistans kominote entènasyonal la pou ede l sekirize peyi a, ke gang vyolan ap goumen pou kontwole.
Nasyonzini estime yon afè 200,000 Ayisyen oblije kouri kite kay yo akoz zak vyolans yo kap ogmante pi plis chak jou, kote gang ame yo touye moun pa bann e pa pakèt epi komèt kidnaping, vyòl epi boule kay moun.
Dapre moun ki siyen petisyon an, deplwaman polisye yo "non sèlman ridikil e pa fè sans, men li pa konstitisyonèl."
Desizyon pou deplwaye polisye Kenyan yo pat gen patisipasyon piblik la epitou li se yon vyolasyon konstitisyon an paske se sèlman manm lame Kenya ke peyi a ka deplwaye andeyò peyi a, dapre petisyon an.