Grenadye yo pèdi (3-1), nan State Farm Stadium nan Glendale, Arizona. Stad la, te plen a krake, jedi swa, nan moman Ayiti tap jwe kont ekip Meksik la, nan 2e match yo nan Gold Cup la ki ap fèt nan peyi Etazini.
Se Danley Jean Jacques ki make grenn gòl Ayiti a.
Apre gwo viktwa yo (2-1) sou ekip Qatar la dimanch pase, Grenadye yo te al chache kalifikasyon yo pou 2e tou konpetisyon an kont ekip Meksik la jedi. Yon ekip Ayiti ki te diferan de sa antrenè a, Gabriel Calderon, te mete fas ak Qatar.
Pou 2e match la, Coach la te deside titilarize Danley Jean Jacques ansanm ak Donald Guerrier. Se Donald Guerrier ki ta pral jwenn premye gwo aksyon Ayiti nan match la.
Grenadye a vòlè yon balon nan kare Meksiken yo, pa leve tèt li pou l wè gen Duckens Nazon ak Frantzdy Pierrot kap mande l boul la, chwazi tire nan kan an, malerezman pou li, Ochoa, gadyen meksien an kenbe boul la sèk. Nou tap jwe 28 minit nan match foubòl la.
Jwe Meksiken Santiago Gimenez make yon gol kont Ayiti nan dezyem mitan match Gold Cup CONCACAF la nan stad State Farm la nan eta Arizona, 29 Jyen 2023.
Malgre atak ekip Meksik la, Ayiti te rive antre nan vestyè a ak filè l vyèj. Men sa ta pral chanje nan 2e mita an kote Meksik make 2 gòl pou l menen 2-0 sou Ayiti.
Ayiti ta pral reveye l gras ak jwè FC Metz la, ki ta pral rebay espwa ak Grenadye yo, lè li fè yon gòl pou mete eskò a 2-1.
Se premye fwa Ayiti rive bay Meksik gòl depi 1981. E se premye fwa tou nan yon match Gold Cup Ayiti fè gòl kont Meksik.
Ayiti te manke jwenn egalizasyon an, apre menm Danley Jean Jacques sa ki te cho anpil, ta pral vòlè yon balon nan pye Meksiken yo. Jean Jacques pase boul la bay Pierrot, ki tire nan gòl, malerezman bout chout Grenadye a te kontre e ale deyò (kònè).
Ayiti patka egalize malgre efò yo. Nan fen match la, Grenadye yo pran yon 3e gòl ki kraze espwa yo.
Match la fini (3-1). Meksik kalifye pou 2e tou. Ayiti oblije tann e pral chache kalifikasyon l kont ekip Ondiras la dimanch pwochen nan lakou Charlotte, eta Kawolin di Nò.