Administrasyon Trump la ankouraje anplwaye Ajans Entènasyonal pou Devlopman an, USAID, pou yo rejwenn jefò pou transfòme fason Washington debouse asistans nan mond lan ak politik "Amerik an Premye" Trump la.
Administrasyon an menase pou pran "mezi disiplinè" kont nempòt ki moun ki pa okipe lòd yo pase.
Yon memo chaje ak pawòl piman bouk ke yo voye Samdi bay plis pase 10,000 anplwaye USAID ofri plis konsey pa rapò ak direktiv "kanpe travay" ki efektivman bloke tout asistans etranje Etazini toupatou nan mond lan. Memo a ke Reuters revize detaye sa otorite yo atann de anplwaye yo epi kijan pou yo atenn objektif Trump yo.
Ken Jackson, administratè adjwen pou manadjment ak resous ekri nan yon memo li voye bay anplwaye yo ke: "nou gen responsabilite pou n apiye Prezidan an epi ede l atenn vizyon li (pou peyi a).
USAID ak Konsèy Sekirite Nasyonal Lamezonblanch la poko reyaji sou nouvèl la.
Memo a choke gwoup imanitè ak kominote kap travay sou asistans devlopman toupatou nan mond lan. Tandiske direktiv la sanble afekte yon pakèt peyi, gen ensètitid pa rapò ak kijan yo pral mete l an aplikasyon.
