Prezidan kolonbyen an Gustavo Petro mande pèp ayisyen an padon pou zak asasinay mèsenè kolonbyen yo fè sou ansyen prezidan ayisyen an Jovenel Moïse nan dat 7 jiyè 2021 an.
Nan lide pou ranfòse kowoperasyon ant Ayiti ak Kolonbi, prezidan kolonbyen an vizite Ayiti, ayè mèkredi a (22 Janvye), e rankontre prezidan konsèy prezidansyèl tranzisyon an, Leslie Voltaire ak premye minis ayisyen Alix Didier Fils-Aimé.
Nan vizit istorik li nan vil Jakmèl, ki twouve l nan Sidès peyi Ayiti, Gustavo Petro prezante eskiz li ak pèp ayisyen an, pou kolonbyen yo ki ta enplike nan lanmò Jovenel Moïse.
Nan diskou li, devan gwo chabrak nan gouvèvman ayisyen an, prezidan kolonbyen an deklare :
"Mwen mande padon pou kolonbyen yo ki touye prezidan w lan. Yo pa reprezantan pèp kolonbyen an".
Pi lwen, Gustavo Petro wete chapo l devan pèp Ayisyen li di ki non sèlman ede Kolonbi jwenn libète, men tou, ki bay pèp Kolonbi a drapo yo genyen jodia.
Konsènan drapo Kolonbi a, Gustavo Petro deklare : "Se revolisyon ayisyèn nan ki enspire kreyasyon drapo sa. Koulè ble e wouj la pa sèlman reprezante syèl oubyen san ki koule pou libète. Koulè sa yo senbolize tou drapo ou ak revolisyon w".
