Yves Germain, ki se direktè Caritas Haiti, deklare gwoup nèg ak zam yo fè Pòtoprens tounen yon "vil mò".
Gwoup gang yo kontwole plis pase 80% nan kapital la, selon yon rapò Nasyonzini. Anplis de sa, atak gang yo fòse plizyè milye sitwayen kouri kite kay yo, abandone katye yo, pou y al viv nan kan oubyen nan lòt vil.
Sitiyasyon aktyèl la, se "pi move kriz" Ayiti, selon Yves Germain, ki deplore jan ensekirite ap vale teren e pouse do anpil òganizasyon pou fè yo kite peyi a.
Nan yon entèvyou Yves Germain bay ajans espànyòl EFE, li deklare kominote entènasyonal la bliye Ayiti.
"Malgre vyolasyon dwa moun yo grav anpil, medya yo pa pale ankò de Ayiti e anpil òganizasyon abandone peyi a akòz ensekirite. Kominote entènasyonal la bliye Ayiti". Deklarasyon direktè Caritas Haiti a.
N ap fè sonje, kèk jou avan sa, òganizasyon Plan International te voye yon apèl prese-prese bay kominote entènasyonal la pou mande l bay sa k ap pase an Ayiti a priyorite.
Òganizasyon an te mande pou kominote entènasyonal la pa fèmen je l sou kriz la, ki ap anvlimen pi plis chak jou.
