Apre plizyè ane san kanaval nan peyi a, melomàn ak kanavalye yo pral gen posibilite pou yo taye banda nan kanaval nasyonal la ki ap fèt nan vil Fò Libète soti 2 pou rive 4 mas 2025. Yon bon nouvèl pou sektè kiltirèl la ak gwoup ayisyen yo ki gen lontan yo pa jwe sou pakou kanaval an Ayiti.
An atandan weekend kanaval ofisyèl la nan Fò Libète, abitan site Stenio Vincent yo te yaya kò yo ayè dimanch la nan dimanch pre kanaval, menm jan ak moun nan lòt vil, tankou Jakmèl, ki te lanse fèt kanaval la nan komin nan.
Pou kapital la, Pòtoprens, anyen poko di sou tradisyon dimanch pre kanaval yo.
Anviwon yon mwa edmi anvan lansman kanaval nasyonal la, fanatik yo ap tann gwoup ki ap konfime patisipasyon yo nan pi gwo manifestasyon kiltirèl peyi a.
