Ekip VOA Kreyòl te gen chans vizite youn nan restoran ki ap sèvi popilasyon Nouvèl Orleans ak touris yo manje ayisyen. Se Chef Charly Pierre, yon Ayisyen Ameriken li fèt nan vil Boston, eta Massachusetts ki se pwopriyetè restoran Fritai. Li di misyon ni se bay manje ki gen rasin e ki fèt ak bon epis ayisyen.
Chèf Charly di nou Fritai gen an total 7 ane depi li egziste, e li fè nou konnen ke li patispe nan plizyè emisyon televizyon kwizin, pami yo “Top Chef” ak plizyè lòt ankò.
Meni an gen plizyè pla ayisyen ladann tankou fritay, kabrit, pwason, ak poulè, men tou nan meni a gen anpil manje diferan men ki fèt nan fason ayisyen fè manje yo tankou pa egzanp “Fritai Sandwich” kote yo itize 2 bannann peze epi yo mete vyann (ou ka chwazi kochon oubyen poulè) oswa legim (ou ka chwazi djondjon vejetalyen oubyen tofu), pikliz, ak zaboka.
Gen tout kalite moun ki tap vizite Fritai, lè ekip VOA Kreyòl la te nan restoran an. Nou te wè anpil touris ki t ap manje ki soti nan divespeyi.
Pami touris sa yo, te gen yon jèn dam Ayisyen ki soti Brooklyn, Nouyòk ki te vin manje ak zanmi li. Li fè nou konnen ke li te vini nan vil la pou asiste selebrasyon kanaval Mardi Gras, e li te tou pwofite vin goute kwizin ayisyen an nan Fritai. Li ankouraje tout moun vin fè ekperyans la.
Chèf Charly di nou restoran an rapòte anpil ekonomikman, men li pat ba nou plis detay nou chif anyel ke biznis la rantre.
Dekò restoran an mete an valè kilti ayisen an tou. Pa egzanp, nou te wè plizyè tablo penti ayisyen sou miray bilding nan, e nan penti sa yo Vodou a te byen reprezante.
