VOA Kreyòl nan eta Lwizyann kote ekip la ap fè kouvèti Mardi Gras. Te gen anpil parad atravè vil la nan kad yon kanaval ki sanble tèt koupe ak kalite kanaval nou konn wè ann Ayiti.
Selebrasyon Amriken an rasanble plizyè kilti nan eta a tankou fransè, afriken, ameriken ak ayisyen.
Nan tèt parad jodi a nou te jwenn yon gwoup sosyal kiltirel ki rele Zulu ki òganize parad la. Jèn timoun kou granmoun te defile avek degizman, epi chèn tradisyonèl nan kou yo.
Nou te wè yon parad ki te gen ladann anpil elèv lise, ki te jwe fanfa e ki te akonpaye ak Cheerleaders (yon gwoup medam ki ankonpaye gwoup fanfa yo).
Aktè degize ki te sou chayo te voye plizyè kado bay piblik la tankou pa egzanp, kokoye ki chaje ak desen sou yo, chèn ak lòt objè atistik.
Ekonomi
Sou plan ekonomik parad la, vil la ranpòte anpil kòb. Gen fanmi ki tou pwofite okazsyon an pou you vini avek "griy yo " pou yo fè "barbecue" epi gen restoran mobil ki enstale yo sou twotwa yo nan alantou Kanaval la pou yo vann manje bay popilasyon an.
Gen anpil touris ki fè deplasman pou vin selebre avek pèp New Orleans lan. Otel yo ranpli a krake.
Nan chita nou te fè ak youn nan responsab otèl ki nan chèn Hilton yo , ki pa vle nou idantifye li, li fè nou konnen epòk kananaval la se moman kote yo gen plis kliyan, e anpil nan fwa si touris yo pa fè resèvasyon avan, yo riske pa jwenn yon chanm otel ditou.
Parad Zulu ki fèt nan sant vil New Orleans te gen patisipasyon plis pase 1500 manm gwoup Zulu a.
