Plizyè bandi ki fè pati de gang gran grif ak chèf gang, Andris Altidor, Alyas Ti rat, tonbe, pandan weekend pase a, nan boukantay kout zam ak lapolis. Se sèvis kominikasyon Lapolis Nasyonal Ayiti ki anonse nouvèl la.
Nan lide pou kraze fwaye gang yo an Ayiti, fòs lòd yo mennen plizyè operasyon nan deptaman Latibonit. Nan kad operasyon gwo ponyèt sa yo, otorite yo rive netralize plizyè bandi e reprann kontwòl plizyè lokalite ki te sou lobedyans gwoup nèg ak zam yo.
Fòs lòd yo rive pran kontwòl lokalite tankou, Lyankou, Ti rivyè Latibonit, Kafou pèy, Kafou gwo chodyè, Nan Palmis, kote gang yo te kont mete pòs peyaj,pou fòse chofè ak pasaje peye.
Yon lòt bò, pandan operasyon gason pa kanpe sa yo, lapolis anonse yo sezi plizyè zam epi ogmante prezans yo nan depatman Latibonit.
Pou fini, otorite yo renouvle angajman yo pou kontinye batay kont gang yo nan lide pou tabli sekirite ak lapè nan peyi a.
