Prezidan Joe Biden padone Doktè Anthony Fauchi ak Jeneral retrete Mark Milley epitou plizyè manm komisyon Chanm Depite Etazini ki te mennen ankèt sou atak 6 Janvye kont Capitol la. Prezidan an sèvi ak pouvwa ekstraodinè li genyen antanke chèf d eta nan dènye hè manda li pou pwoteje moun sa yo kont 'revanj' potansyèl administrasyon Trump la.
Desizyon Biden pran an vini apre Donald Trump te lanse avètisman pou di li gen yon lis chaje ak non enmi ki trayi li politikman oubyen ki te eseye rann li responsab pou tantativ li te fè pou ranvèse eleksyon 2020 an ak pou wol li nan atak kont Capitol la, 6 Janvye 2021.
Trump chwazi moun pou kabinè li ki te apiye manti li te bay sou koze sa a e ki pwomèt po yo ede l pini moun ki te patisipe nan jefo pou mennen ankèt sou li.
Biden fè konnen nan yon kominike: "asirans padon sa yo bay pa reprezante yon konsantman ke moun sa yo te fè anyen ki mal, ni moun pa dwe pran li tankou si y ap admèt yo te komèt yon ofans. Peyi nou dwe responsab leta sa yo yon dèt gratitid pou angajman san pran souf yo genyen vizavi peyi nou."
Se yon tradisyon pou yon prezidan akode padon nan fen manda li men d abitid se pou senp sitwayen Ameriken ki kondane pou krim yo komèt. Sepandan, Biden sèvi ak pouvwa a nan sans pi laj posib e yon fason okenn prezidan poko janm fè anvan. Li padone moun ki poko menm fè fas ak ankèt. Lè yon moun aksepte gras la li souzantandi ke li admèt li fè yon bagay ki mal men moun Biden padone yo pa gen akizasyon ofisyèl pou okenn krim.
