Fòs Sipò Sekirite Miltinasyonal la MSS pibliye yon nòt de près 6 Desanm kote li demanti nouvèl kap sikile sou divès rezo sosyal ki site ajans nouvèl Reuters e ki di kòmkwa kèk pami manm Kenyan MSS la konsidere demisyonnen akoz yo poko touche salè yo.
"MSS la demanti kategorikman alegasyon sa yo. Reuters News pa janm kontakte MSS la pou mande eklèsisman." Li ajoute "enfòmasyon yo difize yo fo e malveyan a la fwa."
MSS la fè konnen tout manm fòs miltinasyonal la resevwa salè yo e sa enkli endamnite mansyèl yo.
Jounal Nation nan peyi Kenya pibliye yon nouvel ki gen kòm sous Reuters ki di gen 20 ofisye MSS la ki bay demisyon yo akoz yo pa peye yo. Nouvèl la di ofisye yo voye lèt bay siperyè yo men yo pa resevwa okenn repons e ke yo kontinye ap sèvi kòm manm misyon miltinasyonal la.
Kòmandan MSS la di "oken ofisye MSS la pa prezante demisyon li jan yo pretann nan."
Jounalis VOA Afrik Salem Solomon kontribye a repòtaj sa a
