Avoka leta yo nan Nouyòk di yo opoze tout jefò pou kite tonbe kondanasyon Donald Trump nan pwosè lajan li peye anba tab la. Sepandan, avoka yo di yo kapab dakò pou ranvwaye santans la pou jouk apre dezyèm manda prezidansyèl li a.
Avoka yo detaye pozisyon yo nan yon dosye yo depoze nan tribinal la Madi.
Avoka Trump yo mande pou yo kite pwosè a tonbe puiske kliyan yo eli prezidan Etazini.
Tribinal la te jwenn Trump koupab nan mwad Me a pou 34 chèf akizasyon ki gen pou wè ak falsifikasyon dokiman komèsyal pou kache yon konplo pou enfliyanse eleksyon 2016 la. Pou fè sa misye te peye yon aktris film pòrno lajan pou silans li pou l pa di piblikman ke yo te gen relasyon seksyèl.
Trump demanti akizasyon yo.
Jij Juan M. Merchan te sispann pwosesis legal la semèn pase a apre avoka akizasyon yo te mande plis tan pou reflechi sou pwochen etap yo fas ak eleksyon Trump.
Trump te sipoze konparèt devan tribinal pou tande santans li 26 Novanm. Jij Merchan poko fikse yon dat pou bay desizyon li.
