Komite Etik Chanm Depite Etazini sipoze rankontre Mèkredi pou deside si l pral pibliye rapo envestigasyon li te fè sou ansyen Depite Matt Gaetz, ke yo akize de abi seksyèl ak itilizasyon dwog ilegal anvan Prezidan-eli Donald Trump te chwazi l pou pos minis jistis Etazini nan nouvo administrasyon li an.
Plizyè senatè Ameriken - Demokrat kou Repibliken - mande pou yo pibliye rapo a pou yo ka reflechi byen sou dosye Gaetz la nan moman yap antreprann wol konstitisyonèl yo pou swa konfime oubyen rejte moun nouvo prezidan an nomen pou Kabinè li.
Mèkredi pase a, Trump te nomen Gaetz, 42 zan, yon depite Repibliken ki reprezante Florid depi 8 an nan Lachanm, kom nouvo responsab ministè jistis la. Kèk hè d tan pi ta, Gaetz te bay demisyon li kom depite nan Kongrè a, malgre li te fèk sot ranpote yon 5èm manda nan eleksyon Novanm nan. Demisyon li mete fen nan ankèt Komite Etik Lachanm nan ki te prèske fini.
Sepandan li pat klè si panèl la tapral pibliye konklizyon ankèt li a.
Komite a, ki gen 5 Demokrat ak 5 Repibliken, tap envestige akizasyon kom kwa Gaetz te gen relasyon seksyèl ak yon tinedjè 17 an (ki se yon bagay ki ilegal Ozetazini) epi ke l te pran dwog ilisit. Gaetz demanti akizasyon an.
Depatman Jistis la, ke Gaetz espere dirije te mennen ankèt sou dosye a men ane pase a li pat deside enkilpe misye.
Prezidan Chanm Depite a, Mike Johnson, kap dirije yon majorite tou mens pati Repibliken an genyen nan Lachanm, deklare yo pata dwe pibliye rapo komite etik la paske Gaetz pa yon depite anko. Sepandan gen ka kote yo te fè sa nan le pase.
Depite Johnson di CNN Dimanch ke senatè kap revize nominasyon Gaetz la kom minis jistis pral patisipe nan yon "bon jan pwosesis" pou revize dosye a men ke yo pa bezwen wè rapo Komite Etik Chanm Depite a.
Sepandan gen kèk senatè ki sigjere yo pral egzije komite a remèt rapo a ba yo si yo pa deside ba yo l volontèman.
Jounalis VOA Ken Bredemeier ekri vesyon orijinal repotaj sa a
