Prezidan-eli Donald Trump deklare Lendi li nomen ansyen depite Repibliken eta Wisconsin, Sean Duffy, ki se yon animatè pou rezo nouvèl Fox Business News, pou pòs sekretè transpò.
Si Sena a konfime misye, Diffy pral jere aviyasyon, otomobil, tren, tranzit ak lòt politik transpò depatman an, ki gen yon bidjè apepre $110 milya. Lap gen opòtinite tou jere lajan administrasyon Biden nan te bay depatman sa a an 2021 pou amelyore enfrastrikti peyi a. Bidjè sa a egal $1 trilyon. Ladann gen stasyon pou chaje otomobil elektrik yo.
Duffy pibliye yon mesaj sou rezo sosyal yo kote l di: "Mwen paka tann ede w louvri yon nouvo laj lò transpòtasyon."
Trump sèmante pou l ranvèse règleman administrasyon Biden nan te enpoze sou polisyon otomobil yo degaje. Li di li gen plan pou tanmen pwosesis pou defè règ pi sevè administrasyon Biden nan ke yo te finalize pi bonè ane sa a, osito ke pran pouvwa a.
Duffy pral fè fas ak plizyè gwo defi transpò.
Trump deklare Duffy pral priyorize "Ekselans, Konpetans, Konpetisyon ak Bote pandan lap rebati otowout, tinèl, pon ak ayeropò Etazini yo. Li pral asire pò nou yo ak baraj nou sèvi Ekonomi a san fè konpwomi pa rapò ak Sekirite Nasyonal nou."
