Depi 17 oktòb 2024, gwoup nèg ak zam lanse plizyè atak kont katye popilè Solino, ki twouve l nan kapital la Pòtoprens.
Atak sa yo, ki voye plizyè sitwayen nan peyo chapo, fòse 12,619 moun mare pakèt yo pou kite zòn nan.
Pandan atak sa yo, gang yo boule plizyè kay rapyetè, fòse plizyè milye abitan bay talon yo nan katye a.
Selon OIM, 58% nan moun ki kouri yo al refijye yo nan sant akèy.
Ajans Nasyonzini an fè konnen, responsab yo oblije kreye 7 nouvo sit pou akeyi moun k ap kouri yo, toutpandan li souliye bezwen yo ap vin pi plis chak jou.
Nan yon pòs sou twitter, OIM deklare "Alòske bezwen yo pa sispann vin pi plis, resous yo pa sifi pou kontinye bay èd nesesè".
N ap raple atak gang yo nan peyi a fòse plis pase 700 mil moun kite lakay yo, selon sa OIM fè konnen. Yon sitiyason ki lage plizyè fanmi 2 bra pandye.
N ap souliye polis nasyonal Ayiti ansanm ak misyon miltinasyonal la toujou ap mennen operasyon divès kote nan peyi a pou dechouke fwaye gang yo nan peyi a, ki pa sispan mete dlo nan je popilasyon an.
Pou bay MMSS la ak PNH la jarèt nan batay y ap mennen pou kwape gang yo, Lèzetazini voye an Ayiti plizyè machin blende.
Blende sa yo rive an Ayiti soyi 28 oktòb pou rive 3 novanm 2024 la
