Yon responsab wo plase Depatman d Eta di VOA Sekretè d Eta Antony Blinken ap vwayaje Ayiti ak Repibik Dominikèn semèn sa a.
Dapre Brian Nichols, ki se Sekretè d Eta Adjwen Ameriken pou Zafè Emisfè Oksidantal yo, Blinken pral vizite Potoprens 5 Septanm pou fè chita tande ak Premye Minis Ayisyen Garry Conille ak manm yo nan Konsèy Prezidansyèl Tranzisyon an.
" Sekretè a pral re-afime angajman Etazini pran pou l apiye pèp Ayisyen an epi jefo pou retabli sekirite ak lapè ann Ayiti. Sekretè a, Conille ak Konsèy Prezidansyèl Tranzisyon an va pale tou sou retou Ayiti sou chimen demokrasi ak bezwen ijan pou oganize eleksyon pou pèp Ayisyen an ka detèmine pwop avni li."
Nichols di Etazini rekonèt ke Ayiti pran mezi enpotan pandan mwa ki pase yo. Met sou nominasyon yon premye minis ak minis li yo, e li di gen siy pwogrè nan lit kont ensekirite a tankou pa egzanp ouvèti ayeropo a, rekomansman vol komèsyal yo epi aktivite ekonomik.
Ensekirite
Nichols di Misyon Sekirite ke Kenya ap mennen ansanm ak Polis Nasyonal Ayiti a fè pwogrè tou.
"Nou konstate yon kokenn ogmantasyon nan patwouy ak operasyon ki vize retabli sekirite ak lavi nòmal ann Ayiti. Pandan vizit li ann Ayiti, Sekretè Blinken pral rankontre Chèf MSS la ak PNH la pou souliyen angajman Etazini pran pou ede yo gen siksè. Nou va diskite tou sou bezwen Ayiti pou li ka remete peyi a sou wout stabilite, devlopman ak asistans imanitè."
Fos Mentyen Lapè?
Nichols pat reponn dirèkteman kestyon jounalis yo te poze l pa rapo ak bwi kap kouri pou di kom kwa Etazini ap chache konvèti misyon MSS la pou fè li tounen yon fos lapè LONU tradisyonèl.
"Mwen kwè lè nou te gen opotinite vizite Ayiti ansanm ak Anbasadris Linda Thomas-Greenfield lè MSS la te komanse deplwaye epi fè konsta ekipman yo ak baz yo, operasyon kap ogmante, nou te wè pwogrè nan zafè sekirite ann Ayiti. Men nou bezwen wè pwogrè politik, angajman nan Konsèy Prezidansyèl Tranzisyon an e priyorite Sekretè a se asire ke pwogrè kontinye fèt nan domèn oganizasyon eleksyon. Donk pa rapo ak sa, nou gen yon misyon ki bay rezilta, ki djanm e ki gen kapsite pou rive jwenn kalite pwogrè nan domèn sekirite a ke pèp Ayisyen an merite - e nap travay ak patnè entènasyonal nou yo pou tabli yon kad ki asire finansman ke nou ka fè konfyans epi ase ankourajman pou moun nan misyon an. Se yon priyorite e yon misyon lapè ofisyèl se ka ki ka fè nou akonpli objektif sa a. Men nap gade plizyè chwa ki devan nou."
Nichols di Depatman Defans bay plis pase $200 milyon pou konstriksyon, operasyon ak transpò nan zonn kote baz MSS la sitye.
Nichols di VOA Etazini kontinye ankouraje peyi etranje pou yo kontribye lajan nan Trust Fund MSS la pou kore misyon an pi plis.
Skandal Koripsyon BNC a
Jounalis yo mande tou si Sekretè Blinken pral soulve pandan vizit li kestyon sou kèk manm konsèy la ki gen non yo endekse nan rapo koripsyon an.
"Mwen kwè sètènman Sekretè a pral moutre jan li enpotan pou gen transparans pa rapo ak akizasyon ki gen pou wè ak dosye BNC a. Nou kwè otorite Ayisyen yo dwe mennen ankèt sou sa epi trennen responsab yo devan lajistis. Mwen su Sekretè a pral soulve kestyon sa a pandan sejou li ann Ayiti."
Apre vizit li nan peyi d Ayiti, Blinken va pran avyon pou l al Repiblik Dominikèn, kote li pral rankontre Prezidan Luis Abinader.
Korespondan VOA nan Depatman d Eta, Nike Ching, kontribye a repotaj sa a
