Premye Minis Ayisyen Ariel Henry ateri Pòtoriko. Dapre afilye VOA nan San Juan, premye minis la te abò yon ti avyon prive ki tap eseye ateri Sen Domeng. Gouvenman Dominiken an refize bay otorizasyon l pou Henry ateri sou teritwa Dominiken.
Se konsa avyon prive a te pran direksyon Pòtoriko, ki se teritwa Ameriken.
Maten an, VOA Kreyol te mande Misyon Ayisyen Nouyok la ki kote Henry ye, yo te reponn ke yo pa konnen.
Apremidi a, jounalis Lamezonblanch poze potpawol Konsey Nasyonal Sekirite a menm kestyon an. John Kirby di:
"M a kite premye minis la di ki kote li ye. Men m pa o kouran ke nou (Etazini) konnen ki kote li ye."
Nan komansman semen nan, VOA te mande Depatman d Eta si l konnen ki kote PM Ariel Henry ye, yon pot pawol te refere nou a gouvenman Ayisyen an.
Dapre afilye VOA CDN, avyon prive Ariel Henry a te dekole nan ayerwopò Teterboro nan New Jerze, sou kòt es Etazini. Li ateri apremidi a nan ayewopò Luis Munoz Marin nan San Juan.
Teterboro se yon ayeropò kote ki gen anpil avyon prive ke moun ka lwe. Men pri avyon sa yo che - swa plizye dizen milye dola. Konpayi avyon an oblije divilge lis pasaje li genyen abò li, e otorite peyi kote li prale a kapab aksepte ou refize aterisaj la.
Selon CDN, otorite sekirite Dominiken yo te konsidere pandan plizye hè d tan si yo ta dwe kite avyon Henry a ateri lakay yo. An fen Dominiken yo te deside pa kite l ateri.
Premye Minis Henry paka ateri an Ayiti akoz menas gang ame yo poze pou ayewopò entenasyonal Toussaint Louverture la. Gang yo te eseye pran kontwòl ayewopò a Lendi.
Henry rete silansye pandan lap siyonnen mond lan kote li vizite Amerik di Sid epi apre sa l Afrik, san li pa di piblikman ki jou lap tounen Ayiti.
Nan Guyana, premye minis la te asiste rankont lide CARICOM yo. Apre sa li te vwayaje Nairobi, Kenya pou siyen yon ako ak Prezidan William Ruto pou otorize polisye Kenyan yo dirije fos sekirite miltinasyonal ki pral ede Ayiti jere zak vyolans gang yo epi retabli sekirite.
VOA te mande gouvenman Kenyan an ranseyman sou ki kote premye minis la ye Lendi. Prezidans la te refere nou a ministe afe etranje a ki te refere nou a ministe l entere a san yo pat janm reponn kestyon an.
Nan yon deklarasyon li bay jounalis yo apremidi a chef gang ame puisan Jimmy Cherizier te reitere ke premye objektif ansanm gang "Viv Ansanm" se "kapote gouvenman Ariel Henry a".
Lezetazini kondane deklarasyon ak aksyon Cherizier yo.
Yon potpawol Depatman d Eta di VOA:
"Etazini ap veye sityasyon an de pre e nou kondane jefò moun kap aji nan pwòp entere pa yo ap fè pou destabilize Ayiti."
Lamezonblanch di jodia ke lap travay ak patne entenasyonal li yo pou ke yo ke deplwaye fos sekirite miltinasyonal la an Ayiti "pi vit posib. "
Jean Michel Mathurin, Gesell Tobias ak afilye VOA nan Repiblik Dominiken CDN kontribye a repotaj sa a
