Minis afè etranjè 7 pi gran puisans endistriyalize yo ap fè chita tande nan peyi Itali.

Yo gen espwa patwone yon seselfe nan Gaza ak Liban, sa ki reprezante pi gwo priyorite ajènda yo.

Rankont vil Wòm nan rasanble minis peyi Etazini, Kanada, La Frans, Almay, Itali, Japon ak Angletè.

Premye jounen rankont 2 jou a, minis Arabi Saoudit, Ejipt, Jòdani, Emira Arab Ini ak Qatar pral patisipe ansanm ak sekretè jeneral Lig Arab la.

Ministè afè etranjè Itali a di minis yo pral diskite sou jefò pou jwenn yon seselfe nan Gaza ak Liban.

Yon lòt gwo kestyon yo pral diskite se Ikrèn.

Fanmi Palestinyen nan Gaza souvan manje yon sèl fwa pa jou, menm nan zòn kote gwoup imanite yo gen plis aksè pase zòn izole yo nan nò a ki prèske finn detwi nèt.

Yon fanmi kap viv nan yon tant nan rejyon santral Gaza di yal dòmi grangou chak swa.

Biwo Imanitè Nasyonzuni lanse avètisman pou di gen gwo ogmantasyon nan kantite fwaye kap fè fas ak grangou nan rejyon santral ak sid Gaza.

Ekspè yo di yon famin ap devlope nan nò a.

Izrayèl di li kite ase asistans antre. Men gwoup imanitè yo di restriksyon Izrayelyen yo ak batay kap kontinye epi degradasyon lwa ak lòd poze gwo obstak ki anpeche yo distribye asistans kòmsadwa.

Yon lòt manda CPI pou menm rezon yo vize Mohammed Deif, chèf bra ame Hamas la, ki te dirije yon atak sanglan 7 oktòb 2023 sou teritwa Izrayèl, ki te swiv pa yon ofansiv militè nan bann Gaza a, ki depafini anba gwo bonbadman depi lè sa.

"Pèsonn pa ka fè nou, espesyalman mwen, sispann defann peyi nou pa nenpòt mwayen posib," Benjamin Netanyahu te deklare nan yon mesaj bay sitwayen li jedi swa.

Dirijan an te deja kritike desizyon sa a kòm yon aksyon "antisemit" epi li te prezante tèt li kòm viktim yon nouvo "Pwosè Dreyfus," yon referans a kapitèn franse jwif la ki te kondane pou espyonaj nan fen diznevyèm syèk la, anvan yo te deklare l inosan epi reyabilite l.

Prezidan Ameriken Joe Biden te kalifye desizyon an kòm "eskandal," manda CPI a limite deplasman de responsab Izrayelyen yo. Nenpòt nan 124 peyi ki manm CPI yo teyorikman ta oblije arete yo si yo antre nan teritwa yo, menm si anpil peyi tankou Larisi, Etazini, ak Lachin pa rekonèt konpetans CPI.

Pou mouvman islamik palestinyen an, yo akeyi pouswit kont lidè Izrayelyen yo kòm yon "etap enpòtan nan direksyon jistis," menm si yo pa te mansyone manda arestasyon ki anonse an menm tan kont lidè militè yo a.