Pòtpawòl adjwen Mezon Blanch la, Karine Jean-Pierre, te reponn kesyon jounalis poze sou Ayiti madi 5 òktòb 2021 an, pandan li te nan avyon prezidansyel la, Air Force One, nan wout pou ale nan eta Michigan ak Prezidan Joe Biden.
Men sa yo mande l ak sa li reponn:
Q: Ki preparasyon administrasyon Biden nan ap fè pou 60.000 migran Ayisyen k ap vwayaje aktyèlman depi Amerik Santral la pou yo vin Ozetazini?
KARINE JP: Sa m kapab di w sè ke nou kontinye ap aplike (Lwa) Tit 42 a sou frontyè a. Jan m te deja di sa, se yon lwa ki gen rapò ak sante piblik, se pa yon politik imigrasyon pou fanmi ak moun ki vwayaje pou kont yo - men pito yon manda CDC (Sant pou Kontwòl Maladi) ke nou aplike lè sa posib. Desizyon pou konnen kiyès pou nou kite antre ak kiyes pou nou ekspilse baze sou plizyè faktè - pami yo gen kesyon pou konnen konbe moun ki nan fanmi an, ki akò nou genyen ak peyi kote yo soti a oubyen peyi kote yo t ap viv anvan yo rive sou frontyè Etazini.
Yon lòt faktè nou itilize pou n detèmine si yon moun pral nan detansyon, se kapasite sant Sèvis Imigrasyon ak la Dwann nan ICE epi Gad Frontyè a genyen pou mete moun yo. Jan nou di sa plizyè fwa, moun ke nou pa ka ekspilse yo, nou mete yo sou lis moun ki gen pou parèt devan yon jij ki pral deside si yo gen dwa rete Ozetazini e nou remèt yo dokiman ki di yo gen pou yo konparèt devan lajistis apre sa. Li posib ke nou sèvi ak kèk lòt mwayen (altenatif) pou nou pran yon desizyon sou moun sa yo; men sa mande pou yo ale nan biwo ICE kote yo va kòmanse pwochen etap pwosesis la; yo rapli papye ki pèmèt ka yo sòti nan men Gad Frontye a pou l ale jwenn ICE epi nou chache mwayen ki pèmèt yo pa oblije rete an detansyon pandan y ap tann pwosesis imigrasyon an avanse.
Pwosesis sa a an plas nan tout zòn fwontyè a. Jan ou ka imajine sa, n ap travay ak lidè nan rejyon an sou sitiyasyon migran sa yo k ap vini sou fwontyè a; men nou gen yon sistem an plas ke n ap eseye suiv epi nou kontinye lanse apèl bay migran yo pou di yo pa vini kounye a. Se yon bagay n ap fè depi kèk semenn deja e nou pral eseye kontinye fè l.
Q: Anvwaye Espesyal Prezidan Biden pou Ayiti, Daniel Foote, pral reponn kesyon Komisyon Chanm dè Reprezantan k ap travay sou Zafè Etranjè a semenn sa a. Eske La Mezon Blanch pran kontak ak misye?
KARINE JP: M pa gen anyen pou m di w pa rapò ak kesyon sa a.
Korespondan VOA nan Mezon Blanch, Patsy Widakuswara, kontribye nan repòtaj sa a.