VOA Kreyol poze Depatman d'Eta 2 kestyon sou Ayiti jodia. Men repons nou jwenn.
Q: 16 Novanm fè yon mwa depi gang 400 Mawozo kidnape 17 misyonè (Ameriken ak Kanadyen), kisa ou ka di nou pa rapò ak sityasyon moun sa yo?
DEPATMAN D'ETA: "Nou ka konfime ke yo kidnape 17 moun, pami yo 16 sitwayen Ameriken ke yo kidnape Pòtoprens 16 Oktòb. Byenèt ak sekirite sitwayen Ameriken ki nan peyi etranje se yon gwo priyorite pou Depatman d'Eta.
Gouvènman Ameriken an voye pèsonèl adisyonèl ak resous pou apiye jefò kap fèt pou libere sitwayen Ameriken sa yo e asire sekirite yo.
Anbasad nou ann Ayiti gen kontak tout tan ak Polis Nasyonal Ayiti, Christian Aid Ministries, ak manm fanmi viktim yo. Nou pral kontinye travay ak yo, ak gouvènman Kanadyen an epi patnè nou yo nan lòt ajans pandan nap mennen ankèt sou kidnapping nan.
Nou va bay lòt enfòmasyon sou sa lè nou kapab, pandan nap pran an konsiderasyon kontrent yon envestigasyon aktif ak pwoteksyon sekirite moun ki konsène yo."
Q: Latiki arete Samir Handal pandan li tap fè eskal nan peyi sa a nan wout pou'l al Jodani. Misye se youn nan sispèk PNH ap chache an koneksyon ak asasina Prezidan Jovenel Moise. Medya Ayisyen yo rapote ke Handal te pran avyon Miami pou'l al Tiki. Poukisa Otorite Ameriken yo pa arete Handal nan Miami?
DEPATMAN D'ETA: "Lezetazuni apiye yon ankèt a fon ak endepandan sou asasina Prezidan Moise la ki ann ako ak ni lwa Ayiti ni lwa entènasyonal e ki konfòme ak standar eta de dwa yo. Nou vle wè moun ki te planifye, finanse epi egzekite asasina ansyen Prezidan Moise la parèt devan la jistis pou pran responsabilite.
Nou refere'w a Gouvenman Ayiti pou enfomasyon sou pwogrè ankèt sa a kap kontinye sou asasina Prezidan Moise la. Nou refere'w tou a FBI pou repons sou lòt kestyon ou ta genyen sou sa."
Korespondan VOA nan Depatman d'Eta, Cindy Saine kontribye a repotaj sa a