La Mezon blanch fe konnen administrasyon an ap travay sou yon solisyon pou deplwaman rezo 5G a ki pral mentni - pi wo nivo sekirite.
Pot pawol Jen Psaki di "konvesasyon yo ap kontinye. Mwen pa gen anyen pou di pou kounyea. Men espas ayeryen nou gen plis sekirite pase tout peyi nan mond lan. Nou pran angajman pou'n jwenn yon solisyon pou deplwaman 5G a ki mentni pi wo nivo sekirite a pandan nap minimize enpak sou vwayaj avyon, operasyon kago yo ak jefo pou bay ekonomi a yon bourad. Nou konprann kisa ki an je pou tou le 2 endistri yo. Nap patisipe aktivman nan konvesasyon ak FAA, FCC, konpayi telefon mobil, konpayi ayeryen pou jwenn yon solisyon. E mwen kwe ak koperasyon sa a nap trase yon bon plan pou lavni e ki mete sekirite vwayaj nan avyon kom pi gwo priyorite nou."
Jefo pou jwenn yon solisyon kritik apre konpayi ayeryen yo lanse avetisman pou di nouvo sevis 5G a pral gen konsekans pou vol yo. PDG pi gwo konpayi yo di enteferans ak sistem ayeryen yo taka pi grav pase sa yo te kwe e sa ka anpeche avyon yo vole.
Endistri a dozado ak rezo telefon AT&T epi Verizon sou kestyon sevis 5G a ki sipoze tanmen Mekredi.
Nouvo sevis la sevi ak yon segman spektwom radyo ki rele C-Band, ki gen yon frekans ki pwoch ak aparey avyon yo itilize pou mezire espas ant yomenm ak te a. Pilot yo sevi ak sa le pa gen bon vizibilite epi pou konekte ak lot sistem avyon an.
Konpayi telekominikasyon yo bo kote pa yo ak patizan yo di pa gen pwoblem, gen ase espas ant 2 frekans yo pou evite enteferans. Yo ajoute endistri avyasyon an o kouran teknoloji C-Band la depi plizye zane e yo pat fe anyen pou prepare.