Ansyen Prezidan ameriken, Donald Trump, fè kèk deklarasyon sou sitiyasyon migran Ayisyen yo nan yon entèvyou li bay pwogram Sean Hannity'a sou rezo televizyon ameriken FOX News. èò
Nan entèvyou a, ke Misye Trump te fè pa telefòn, li deklare nan moman kote plizyè santèn milye Ayisyen ap eseye antre Ozetazuni, fòk moun konnen ke Ayiti gen yon pwoblèm SIDA.
Misye Trump di: "Ou konnen gen yon lòt bagay moun pa janm pale -sè ke gen plizyè santèn milye moun k ap sòti ann Ayiti pou yo antre Ozetazuni. Ayiti gen yon gwo pwoblem SIDA lakay li. SIDA se yon lòt dimansyon. SIDA se yon gwo pwoblèm; donk, gen de santèn de milye moun k ap antre nan peyi nou an e si ou gade estatistik yo, si ou gade sa k ap pase kounye a ann Ayiti- kote ki gen yon gwo pwoblem SIDA - siman anpil nan moun sa yo gen SIDA e y ap antre nan peyi nou an. Nou pa fè anyen pou n anpeche sa; nou kite nenpot ki moun antre lakay nou. Sa se jwe ak lanmò."
Migran Ayisyen rasanble bo rivye Rio Grande a apre yo finn travese'l pou antre Ozetazuni depi Meksik, Samdi 18 Sept. 2021.
Prezidan Joe Biden pran yon dispozisyon fèm pou l depote pi fò Ayisyen ki travese frontyè peyi a ilegalman selon yon lwa ki rele Tit 42 ke Etazuni te mete ann aplikasyon sou administrasyon Trump la. Lwa sa a gen rapo ak sante piblik. Yon responsab ameriken wo-plase di VOAKREYOL gen kèk moun -tankou fanm ansent ak moun ki pi vilnerab yo- ke Etazuni deside pemet antre nan peyi a; men majorite moun li ranmase sou fwontyè a pa jwenn aksè sa a.
Foto Achiv: Manifestan devan anbasad Etazini Potoprens kont komante Prezidan Donald Trump fe sou Ayiti ak peyi Afriken yo, 18 Janv. 2018.
Se dezyem fwa Prezidan Trump fe yon deklarasyon sou Ayisyen ki soulve gwo pawòl anpil. N ap raple ke nan mwad Janvye 2018, Misye Trump te dekri Ayiti ak peyi Afriken yo kom "peyi latrin" nan yon rankont li t ap fè nan La Mezon Blanch avèk yon gwoup senatè demokrat ak repibliken. Apre sa, Ayisyen ki Ozetazuni ak toupatou nan lemond te pran lari pou yo pwoteste kont deklarasyon sa yo.