Prezidan Joe Biden tanmen yon vire won 5 jou ann Ewòp ak yon rankont manch long li fè avèk Pap Franswa nan Vatikan an kote 2 katolik ki gen plis renome nan lemond yo te diskite sou pandemi KOVID-19 la, chanjman klimatik yo, lamizè soulatè ak lèk lòt kesyon.
Yon douzèn gad suis te akeyi prezidan ameriken an ak madanm li, Jill, nan moman yo te rive nan lakou San Damaso a.
Your browser doesn’t support HTML5
Biden Fè Rankont Manch Long ak Pap Francois nan Vatican an
Se Monseyè Leonardo Sapienza, chèf rezidans pap la, ki te swete koup prezidansyèl la labyenveni.
Apre rankont la, Prezidan Biden di jounalis yo ke sijè avòtman an pa t diskite pandan chite-tande a; men Souvren Pontif la fè l konnen li kontan ke li-menm, prezidan an, li se yon bon katolik e li ta dwe kontinye resevwa kominyon.
Ozetazini, katolik konsèvatè yo lanse kritik pou di prezidan an pa ta dwe resevwa sakreman kominyon akoz pozisyon ni sou kesyon avòtman an.
Prezidan Joe Biden ak Pap Francis apre rankont yo nan Vatican an, 29 Oct. 2021.
Ansuit, Prezidan Biden ak Pap la te gen yon lòt rankont ki te dewoule an presans premyè dam nan ak gwo responsab gouvenman ameriken an.
Dapre Vatikan an, Misye Biden fè Pap Franswa kado yon "chasub tisse" - sètadi yon espes de rad prèt yo te konn mete nan tan lontan; kado a te fabrike an 1930 e se tayè renome Gamarelli ki te koud li. Gwo koutirye sa a te konn travay pou pè jezuit ke pap yo te voye Ozetazuni.
Lamezon Blanch di Prezidan Biden pral fè yon don charite nan non pap la tou. Vatikan an, bo kote pa l, fè konnen Pap Franswa, li menm, ofri prezidan an yon tuil seramik ki gen sou li ikonografi pèlren an kòm desen epi yon koleksyon dokiman pèsonèl pap la.
Prezidan Biden trè fyè de fwa li kòm yon katolik; se toutan l ap di se fwa sa a ki sèvi l kòm gid lè l ap deside ki politik sosyal ak ekonomik pou l aplike.