Yon ekip obsèvatè Lig Arab la gen pou l rive nan Siri pou ede asire ke gouvènman ap respekte pwomès li te fè pou fè fòs sekirite yo sispann atake manifestan yo.
Ekip la ap pare pou l deplwaye plizyè santèn obsèvatè. Siri te aksepte pou l pèmèt obsèvatè yo antre nan peyi a anba presyon mondyal pou l sispann fè san koule avèk operasyon sere-boulon gouvènman siryen an te lanse sou manifestan anti-gouvenmantal yo, sa gen 9 mwa.
Turki ki tou prè a kondane gouvènman siryen an, li di politik li yo fè peyi a tounen yon larivyè san. Minis afè etranjè turk la fè konnen vyolans la bay anpil kè sote sou vrè entansyon Siri e pa gen oken administrasyon ki ka ranpòte la viktwa nan yon lit kont prop pèp li.